DefinePK

Description

فہمیدہ ریاض
بارش میں سوچتا ہے شاعر
جِن بُوندوں میں فقط صدا ہے
بجتی تھیں جُوں ستار پہلے
سینے میں جہاں فسردگی ہے
تھا دل کا وہیں دیار پہلے
وہ دل جو بچھڑ کے کھو گیا ہے
جو خاک میں دفن ہو گیا ہے

جس سمت نظر اُٹھا کے دیکھیں
پامال زمین پر پڑے ہیں
قدروں کے ایاغ ریزہ ریزہ
انسان کے خواب ریزہ ریزہ
ہر کاخ و مکاں سے ہے ہویدا
آدم کا وہ خوفناک چہرہ
بشرے سے ٹپک رہی ہے وحشت
آنکھوں میں سُلگ رہا ہے صحرا
اس کی مردہ رگوں میں رقصاں
بس خواہش کسبِ مال و زر ہے
عریاں اِس طور سے بشر ہے
معدوم تمیزِ خیر و شر ہے

کل تک جو شعار تھا کسو کا
اب سب کا وہ حال ہو گیا ہے
جن پر مجرم خفیف ہوتے
سب کارِ حلال ہو گیا ہے
باقی ہیں بے چراغ و کافور
تہذیب کی حسرتوں کے مدفن
بےراہ روی کی آندھیوں میں
مٹ جائیں گے یہ مزار اک دن

اک بھیگے شاخچے پہ کونپل
سن کر بارش میں مسکرائی
اور اس نے یہ خبر سنائی
آ جاتی ہے بہار اک دن

امروز کا یہ غبار مت دیکھ
یہ روز شکست و ریخت کا ہے
روپوش سہی نہادِ فردا
اک دور چٹخ کے گر رہا ہے
ملبہ چاروں طرف پڑا ہے
اس ملبے سے طلوع ہوں گے
خورشید بکف سوار اک دن
اقدار ہیں شرط آدمیّت
انسان دیکھے گا خواب اک دن

بچھڑا دل تجھ سے آ ملے گا
جیسے لپکا گھٹا میں کوندا
جیسے برسی گھٹا گرج کر
بارش میں سوچتا ہے شاعر