DefinePK

Description

اختر عثمان
شامِ ربذہ ہے کوئی دشت ہے بُوذر ہے کہ میں
میری آشفتہ مزاجی ہی مرے سر ہے کہ میں

اور کوئی بھی نہیں ہے جو تراشے خد و خال
آئنہ سازی کا الزام بھی مجھ پر ہے کہ میں

تیری آوارہ نگاہی کا کوئی علم نہیں
سو تری بزمِ خوش انداز سے بہتر ہے کہ میں

مجھ سے ہو ہی نہیں سکتی یہ طرفداریِ جبر
یہ مری روح میں بیٹھا ہُوا اک ڈر ہے کہ میں

اک طرف حُسن ہے اور ایک طرف میرا ہنر
آج کُھل جائے گا وہ آئنہ پرور ہے کہ میں

نوکِ نیزہ پہ بھلا کون ہے آیت آرا
کُھل نہیں پایا سناں پر یہ کوئی سَر ہے کہ میں

نظر انداز نہ کر پائے گا مجھ کو یہ جہاں
کسی دریا کے نشانے پہ مرا گھر ہے کہ میں

پھول ہی پھول چُنے میں نے سرِ وادیِ عشق
تیرے ہاتھوں میں اٹھایا ہوا پتھر ہے کہ میں

اک زمانے سے یہ سوئی ہوئی خوشبو ہے کہ تُُو
ایک مدت سے یہ جاگا ہُوا اختر ہے کہ میں