DefinePK

Description

اختر عثمان
کچھ بھی نہیں جہان میں، کچھ بھی نہیں جہاں کے بعد
ماتمِ رفتگاں ہے بس، ماتمِ رفتگاں کے بعد

زیست کے تار و پود میں، مرحلۂ وجود میں
آئنہ نمود میں، نیست ہے آسماں کے بعد

دستِ ہنر شعار میں اب کے کوئی ورق نہیں
سلسلۂ نبود ہے، سلسلۂ زباں کے بعد

آج کی بابت آپ کا طرزِ کلام ٹھیک ہے
اور جگہ بھی ٹھیک ہے، ٹھیک ہے اور یہاں کے بعد!

قبر کا یہ تغارچہ، جانے ہے کس کا منتظر
قریۂ خاکداں ہے پھر، قریۂ خاکداں کے بعد

حاصل و گم نشست ہوں، قرب و جوارِ ہست ہوں
زیست کی ایک جست ہوں، موجۂ بے کراں کے بعد

کیسا عجب جنون ہے، چاروں طرف ہی خون ہے
کن فیکوں کا جشن ہے، نعرۂ کن فکاں کے بعد

نوچ کے کھا لیے گئے، سوچ کے کھا لئے گئے
کتنے گلاب گُل ہوئے، غلغلۂ خزاں کے بعد