DefinePK

Description

کلامِ شاعر بزبانِ شاعر
سحر انصاری
محبتّوں کو بے سبب زوال کیسے آ گیا
یہ بیٹھے بیٹھے آج اک خیال کیسے آ گیا

دلوں کے سلسلے ہیں سارے جسم و جاں کے سلسلے
دلوں کے درمیاں کوئی ملال کیسے آ گیا

ابھی تو زندگی کو ریزہ ریزہ چُن رہا ہوں میں
ابھی سے یہ شکست کا سوال کیسے آ گیا

یہ ناؤ کیوں الٹ گئی، یہ نیند کیوں اچٹ گئی
یہ سوتے سوتے خواب کا خیال کیسے آ گیا

بچھڑتے موسموں میں ایک برگِ تازہ کی طرح
نیا نیا سا لمحۂ وصال کیسے آ گیا

ہمارے حال تک کسی خیال کا گزر کہاں
ہمارے حال کا تجھے خیال کیسے آ گیا

بہت اداس تھا، پر اُس سے مسکرا کے بات کی
مجھے بھی رفتہ رفتہ یہ کمال کیسے آ گیا

جو تھی متاعِ زندگی، سحر " انا" وہ کیا ہوئی
یہ زخمِ دل قریبِ اندمال کیسے آ گیا