DefinePK

Description

نصیرؔ ترابی
غمزہ کرو نہ صاحب دم بھر کی صاحبی ہے
جو شمع رہ گئی ہے پلکیں جھپک رہی ہے
شکریہ: سید پرویز جعفری
جشن فہمیدہ ریاض ۲۰۱۶
علی گڑھ المنائی ایسوسی ایشن، ہیوسٹن

غمزہ کرو نہ صاحب دم بھر کی صاحبی ہے
جو شمع رہ گئی ہے پلکیں جھپک رہی ہے

ملحوظ اب کسے ہے وہ ہو کہ اُس کی باتیں
دل اپنا کیا کھنچا ہے دیوار کھنچ گئی ہے

کیا کیا عذاب گزرے ہر بار موسموں کے
کیسی یہ کشتِ جاں ہے اب تک ہری بھری ہے

اس راہِ کشمکش میں آگے بھی سرگراں تھے
آگے بھی اُن پہ ایسی آفت گزر چکی ہے

شاید خبر نہیں ہے آسودۂ ہَوا کو
کشتی کا رخ غلط ہے دریا کی رَو وہی ہے

کچھ تو زبان کھولو کچھ تو نصیر بولو
ناگفتنی نہ کہنا کہ دو جو گفتنی ہے

نصیر ترابی