DefinePK

Description

اختر عثمان
جب یہ مزاج ہے تو پھر دہر سے رسم و راہ کیا
شکوۂ شیخ و شاہ کیا ، گریۂ گاہ گاہ کیا

بود و نبود کی کتھا، قصۂ ہشت لفظ ہے
رات میں التباس کیا،خواب کا اشتباہ کیا

آتی ہوئی بہار میں غرفۂ روح کھولیے
ماتمِ برگِ زرد کیا، رنجِ گل و گیاہ کیا

کارِ کمالِ عشق میں صرفۂ چشم و دل نہیں
لٹ بھی چکی متاعِ جاں، اور کریں تباہ کیا

ہم تو سرِ مشاعرہ خود سے ہی ہم کلام تھے
آپ کی بزمِ شعر کیا، آپ کی واہ واہ کیا

میرِ مشاعرہ کوئی ہے تو بلا سے ہو یہاں
ایک فقیر کے لیے دادِ جہاں پناہ کیا